丹尼斯：Jaguar係英國純種車，至啱成熟穩重嘅男人又或者紳士揸，就好似我同我老友Gary咁．．．．．．
MT：我就話唔係，部車勁流線型，隻豹型到痹好似女仔咁矯捷有型，全自動房車容易揸，梗係啱我同我個FriendKelly啦．．．．．．
終於老編大哥頂唔順我哋兩個記者仔喺度自吹自擂，於是一聲令下就叫我哋將紳士同豹「魅」演繹出嚟。有幾難啫，大把皇帝不愛江山愛美人，更何況一個紳士？就嚟一個野性嚴肅貴族Crossover啦！
記者：鄭達基、梁美甜 攝影：林栢鈞
模特兒：Kelly、Gary（PureModels）
外形
變臉扮成熟型男
丹尼斯：數吓手指，呢幾年接觸JaguarS-Type不下20次，雖然次次都唔同版本，但我最Buy係今日呢架Facelifted新版S-Type3.0V6SE。
雖然圓潤而成熟嘅外表無變過，但Facelifted新版就嚟咗次變臉行動；首先將原來直條式欄柵鬼面罩換成頂級R跑版嘅專用網紋設計，當然泵把都變埋跑車化Design啦！咁仲唔止，新車連胎軨都換埋做新款18吋型號，兩邊鏡殼又加埋電鍍保護殼，搞到成部車個Look都型晒，絕對係嗰種成熟得嚟又有型嘅Style。
實試
電熱座椅好舒服
丹尼斯：哈，果然不出所料，呢款屬Facelifted新版嘅S-Type3.0V6SE，車廂鋪排都係無乜點變，睇落好似悶咗啲，但一樣都係以豪邁氣派行先，照舊周圍都係真皮同桃木，誓要令你一打開車門就感受到佢嗰陣豪氣、一睇就知係Jaguar造嘅房車！不過講就係咁講咋喎，睇真啲原來廠方幫新版S-Type，換咗承托力更高、手觸感更好嘅真皮座椅，其中駕駛席更備有16段電控調校連記憶功能，而前排仲有埋電熱功能，咁冬天坐車嗰陣就唔使再怕凍啦！
240匹 馬力強勁
至於引擎又係咩配搭？咪又係原來嗰台3.0公升V6引擎囉！佢嘅好處就係馬力輸出有240匹，扭力更有300Nm/4,100rpm，而波箱亦都係原來嘅ZF6前速全自動型號，不過我都係覺得可能車重有成1,710kg，起步加速反應都好似差些少，但整體嚟講都算係OK嘅。
外形
曲線引死人
MT：細個出街見到車頭有豹嘅車，覺得好鬼型，尤其見到長髮姐姐揸就更不得了，流線型嘅車身就好似一隻跑動中嘅豹，最正係佢型得嚟鬼死咁有氣質，仲係貴族嗰隻㖭！
今日見到嘅新版S-Type3.0V6SE車頭加個同車身同色鬼面罩，左右倒後鏡同車身都有電鍍同色光面，講真我真係覺得好靚。問丹尼斯部「豹」靚唔靚，佢話部部Jaguar都咁上下，男仔就係咁無想像力！
實試
跑凳撐得住
MT：千祈唔好見笑，揸Jaguar絕對係我自細心願之一；坐入車櫳，幸福感油然而生，事實上座椅全部真皮製造，坐落相當舒服，如果用耐咗啲皮再軟啲就更好！前座採用跑車式仿桶椅，掟彎時張凳完全撐住個身，認真爽！最誇係內櫳嘅木全部出自同一棵樹，全部對色兼對紋，齋坐都覺得自己「貴」好多！
加速快 一踩即囗
我不嬲都唔係追求速度感嘅人，所以之前試車都唔係話要快就話正，唔似啲男仔咁；之不過話晒呢部Jaguar都係房車，而且有成240匹，點都要試吓DreamCar嘅速度感嘅！一踩油門部車即囗都咪話唔驚，啱晒追求速度感嘅女仔；轉彎嗰陣仲覺得好貼地，唔知係咪同用咗18吋合金胎軨有關呢？
新車速蘋
‧新泵把同鬼面罩令賣相更型
‧240匹馬力夠用
‧高大人士或感車廂空間不足
JaguarS-Type3.0V6規格
引擎：2,967c.c.V6DOHC
馬力：240bhp/6,800rpm
扭力：300Nm/4,100rpm
傳動：6前速自動波
售價：$569,900
車輛提供：積架香港（25200989）
