任賢齊早前為新歌《她要我她不愛我》在台灣拍攝MV，今次小齊可謂艷福無邊，MV中與女主角有不少親密鏡頭，他除了要打女方的屁股，其中一幕更與女角同浸在一個木桶中，不過對於這些親密接觸，小齊一點也不享受，還叫苦連天。
今次任賢齊新歌《她要我她不愛我》的MV中，罕有地與女主角談情說愛，小齊原以為非常梳乎，其中一幕要他與女角浸鴛鴦浴，誰知卻是痛苦的開始，由於木桶的尺寸只能容納一個人，所以當二人同浸在木桶中時，小齊要將身體扭作一團，雙手抱膝，以免碰到對方。
「抽筋兼皺皮」
小齊笑說：「原本諗住有美相伴，點知要咁辛苦，事前我都同個女仔講，如果掂到佢就唔好意思，唔係有心嘅，個女仔好高，個桶又細，佢就瞓喺個浴缸中，我就要瑟縮於一角，仲要浸住喺水成幾個鐘，真係好辛苦，拍完呢場之後，手腳都抽筋兼皺皮。」
MV中不乏其他溫馨場面，有一幕講述二人在家中耍花槍，女主角伏在小齊大腿上，讓他打patpat，小齊說：「其實都幾尷尬，有啲唔好意思，都唔敢打得太大力。」MV足足拍了26小時，還要一大早唱現場，他說：「因為book咗啲樂手，咁佢哋夜晚有嘢做，所以要盡早拍咗呢一段先，朝早5點幾就要唱歌，幾驚把聲唔得，好彩都冇問題。」
驚新歌聽到嘔
不過辛苦都是值得的，小齊說：「我好少拍一啲有故事性嘅MV，今次呢個MV真係拍得好好，我自己都好鍾意，就連個女主角聽咗我隻歌廿幾個鐘之後，都覺得隻歌好聽，我幾驚佢話聽到嘔，咁都有啲安慰。」
採訪：胡比
