時間：95年3月
地點：無綫清水灣藝員宿舍
人物：華南理工學員黃小燕
經過：無綫早年都有輸入外勞，引入一班內地華南理工學員嚟香港拍劇，貪佢哋人工平兼好使好用，一度搞到本地藝員冇啖好食，不過有啲女學員嚟香港拍劇之餘，竟然經營副業，搞到無綫顏面無存，最後喺96年斬纜停辦。
92年無綫開辦華南理工學院，學員嚟香港受訓兼實習，一律住喺清水灣宿舍，而最多是非同最為人認識嘅，要算係黃小燕、張延同蔡雲霞入讀嘅第二期藝訓班。
當年班學員雖然人工只得4千幾，但黃小燕同蔡雲霞經常滿身名牌，收入同支出完全唔相稱。話說95年3月，有報道話同黃小燕一向唔妥嘅蔡雲霞，向校監投訴有女學員經常帶男人返宿舍過夜，夜晚不時傳出撞床聲，矛頭直指黃小燕，但最好笑係蔡雲霞投訴完之後，佢竟然俾傳媒影到佢同中年男人拖手去夜街，跟住仲上酒店過夜，真係有口話人冇口話自己。
其實除咗黃小燕同蔡雲霞之外，都有唔少冇乜知名度嘅女學員亂搞男女關係，搞到宿舍春色無邊，由於個名做到臭晒，無綫只好喺96年斬纜。
本欄逢周一至周六刊出