施比受更有福，許志安早前獲點名為理工大學的籌款活動唱主題曲，先籌得20萬，安仔希望在日後理工的籌款騷上獻唱兩曲時，能夠籌得50萬。日前安仔便到錄音室錄主題曲，當日人未到錄音室，他已落柯打給工作人員，為他買黑椒雞扒雙腸飯減壓。
許志安自從當上傑青、又成立個人慈善基金後，便越來越投入慈善工作。早前理工大學便邀請安仔為籌款活動唱主題曲《未夠多》（暫名），籌得20萬元。能夠率先為善事籌款，原來是幕後有善長仁翁，主動捐錢點名要求安仔主唱該曲之故。能夠幫人又獲知音賞識，安仔當然義不容辭，雖然有很多工作在身，但他也答允義唱，上星期便為該曲錄音。
願做隱形慈善家
安仔表示並不是因為當上傑青，才經常做善事，有時他更會選擇做隱形慈善家，他說：「何伯最初都冇人知佢係點樣，其實有冇人知做咗善事唔緊要，最重要係我可以利用自己嘅知名度去幫人。好似今次就有人捐錢叫我唱歌，到時喺佢哋嘅籌款活動上，我會唱兩首歌，希望可以幫手籌到50萬啦！」
錄音忌食朱古力
當日安仔還未到錄音室，已叫工作人員代為買外賣，匆匆到埗的他甫坐下，即進行例行動作，就是先吃一頓才錄音，他說：「我錄音前一定要食嘢，食嘢可以減壓，雖然食朱古力都得，但係有痰對錄音唔好。我習慣食黑椒雞扒雙腸飯，錄完音之後，最緊要飲杯熱奶茶，可以坐喺度一路飲嘢，一路欣賞首歌。」
採訪：王連連 攝影：葉君海
