人物：吳啓華
時間：地點
2003年9月28日：北京
-經過-
吳啓華早年憑住《妙手仁心》電視劇，成功建立師奶殺手形象，好衰唔衰佢因為一時貪玩，喺北京一拖三返酒店，搞到形象直插谷底，到𠵱家都翻唔到身。
2003年9月28日，身在北京拍攝電視劇《佳人有約》嘅吳啓華，俾雜誌影到佢收工之後，去咗一間有小姐陪坐嘅「陽光俱樂部」消遣，佢喺凌晨離開時，竟然一拖三，帶埋三位小姐齊返自己下榻嘅新橋飯店，點知間酒店規定所有女子凌晨時分喺酒店出入時，一定要出示住客證，嗰三位小姐唔係住客，酒店職員當然唔肯畀佢哋入去，搞到吳啓華好鬼尷尬，佢之後惟有先打發其中兩位小姐離開，但酒店職員依然唔肯畀另外嗰位小姐入內，結果吳啓華惟有走後門，喺酒店停車場搭𨋢竄上房，到天光都唔見呢位小姐離開。
事後吳啓華聲稱每日拍劇忙到得一小時瞓覺，話諗唔到會有咁無聊嘅事流傳咁話，不過同吳啓華拍咗一年拖嘅羅泳嫻，都係因為呢件事，之後同佢分手。
雖然呢件事令吳啓華事業滑落，但感情生活依然多姿多采，喺今年2月6日，佢就同拍拖三年嘅石揚子結婚，希望佢今次真係生生性性做人啦！
本欄逢周一至周六刊出