台灣三人女子組合S.H.E日前補拍新歌《藉口》MV，呢首歌最特別嘅地方，係用咗周杰倫（Jay）33首歌嘅歌名串成歌詞，S.H.E就搵一個貌似Jay嘅陳柏村拍攝MV。
以戲謔方式表達
據知呢位假貨嘅酬勞係新台幣3萬元（約7,000港元），比較起Jay上次幫佢哋拍嘅《不作你的朋友》收嘅新台幣100萬元（約24萬港元）認真差天共地。舊年同Jay傳緋聞嘅Hebe，曾為Jay嘅《退後》任MV女主角，男方都有請番Hebe做佢香港同上海演唱會嘅嘉賓，不過今次首新歌就搵老翻Jay演出，唔知係咪怕再次傳緋聞，定佢兩個嘅戀情已經無疾而終呢？
華研宣傳統籌吳慧玲就回應話：「這首歌比較趣味，一開始就想用戲謔的方式呈出，才沒找本尊。」Jay嘅公司就指佢最近忙電影後期製作同新碟，完全冇時間做其他嘢。
