鄭秀文（Sammi）做完八場演唱會後，呢輪佢放緊假，前晚佢約咗梅艷芳前經理人Marianne喺中環麗嘉酒店飲嘢，喺噚日凌晨兩點先由酒店離開，只見Sammi拎住一袋、二袋shopping戰利品上的士，心情同精神狀態都唔錯。
仍有一年約
有雜誌報道話Sammi因為楊千嬅嘅加盟，令佢對東亞老闆林建岳不滿，決定轉投李澤楷旗下嘅大國文化唱片，𠵱家Sammi同東亞唱片仲有年幾合約，小小超明知李進同佢一向有交情，所以搵咗李進出面去撬人。馮仁昭噚日打畀李進，佢話：「我哋當然係想同佢合作，總之佢幾時想過嚟都可以，但現階段，我哋只談朋友關係。」
雖然李進係好想同Sammi合作，但佢哋嗰邊只係得唱片部一瓣，冇電影方面嘅發展，所以相信Sammi暫時應該唔會考慮，而且Sammi同林老闆關係仲好密切，早幾日先一齊唱過K，佢睇嚟唔多似失寵喎！
