呢排啲天氣真係好唔穩定，隨時上晝陽光普照，跟住下晝同夜晚就會同你大唱鄭中基嗰隻首本名曲《黑風暴雨》，即係點？咪係隨時突然同你嚟一場有晒行雷閃電情景嘅狂風暴雨囉！
我悠穎馳就最怕喺呢啲日子揸車出街，除咗因為怕由落大雨而造成嘅塞車之外，仲有就係周圍都係氹；我講嘅所謂氹，除咗由水渠淤塞，又或者係地形關係所造成嘅大水氹之外，最驚就係嗰啲由於路面日久失修，加上大雨將路面結構沖散嘅路氹，呢類路氹好多時一落大雨就會俾啲雨水遮住晒，睇落好似無咩嘢咁，點知一行到落去就「砰」一聲，避震由底插到上頂，嗰種感覺真係High到你唔信。我嗰日落大雨行過葵芳興芳路左轉荃灣路天橋去美孚嗰陣，咪就喺嗰條接駁支路踩中個氹囉，嗰一下真係肉痛死我。所以大家除咗要小心揸車之外，當見到呢類路氹嗰陣，記得打去1823政府熱線，通知有關部門修理啦！
悠穎馳
豪邁不羈，愛車如命，聽幾下引擎聲就知咩車！