慶祝回歸十周年活動，無日無之，好多活動完結之後，無聲無息，大家未必知道有啲活動發生過。報紙傳媒就不斷訪問大人物，講回歸十周年，長篇大論，十幾二十萬字之中，其中只有一句說話受到國際重視，就係董先生講喺二○○二年八月間，曾有放棄聯繫滙率之議；建議者梗係當時嘅財政司司長梁錦松啦。梁司長曾經係香港嘅外滙界topdealer，當然唔怕滙率浮動，但邊度講得服任志剛與董特首吖。
一個會受國際重視嘅慶回歸活動卒之嚟嘞。國泰航空公司認真大手筆，送出一千張經濟客位機票畀八百個得獎名額，獎賞佢哋提出一百個愛香港嘅理由。呢個活動嘅正式名稱係「100個理由同心愛香港」，想話參加，可上網址www.welovehongkong.hk睇吓詳情。自問有創意，愛香港之人，可用文字、照片參加，譬如話：「我愛香港賽馬」、「我愛香港菠蘿油」、「我愛香港蘋果」諸如此類，文字上限為五百字，圖象檔案限5MB，各位讀者想出嚟嘅理由，一定好過左丁山好多，不妨參加試吓，話唔定可以得到一張機票。
周老闆認為獎品豐富，國泰夠慷慨，盛讚飛機陳。飛機陳就快離任，轉戰中國，搞呢個大型送機票活動，算得上係臨別秋波。問大作家才子T愛香港的理由，佢竟然話曾經住在廸士尼酒店，從房間外望，外有草坡，坡上有牛，令佢產生錯覺，以為身在瑞士。呢個都係理由？才子T講笑啫啩？
飛機陳願意送機票，自然想有得益，就係吸引外人來港旅遊，最好就係坐CX來港㖭，故此評審得獎作品之中，有一條係「影響力」，考慮及愛香港理由能否吸引更多人來港旅遊。其他準則包括創意、啓發性、表達素質、原創性以及香港的獨特性。諗諗吓，似乎廣告公司啲創作部門（creative）人員最有機會贏到機票，但比賽分三組，就係公開組、長者組（六十五歲以上）及學生團隊組（四人為一隊），人人有機會！