律師H認為讀大學唔好去歐洲，皆因世界頂尖學者雲集美國，即使牛津劍橋，亦有不如，佢記得當年去倫敦讀法律，一位好叻嘅講師，人工低得可憐，大概只有一萬五千港元，少過香港新入行嘅助理講師。故此嗰位英國講師下課後，匆匆而去，唔同學生交流，而係趕住去另一間書院兼職。肥仔K在倫敦之時，修一科日本政治史，對教授大為傾服，下課後想向教授請教多啲，點知教授冷面相對：「我已經退咗休，大學請我返嚟兼職，薪水低微，又攞番咗我間房，邊度有地方同你傾！況且我要趕火車返屋企。」肥仔K食盡檸檬，為之冇晒癮，慨嘆一聲：「間大學咁窮，唔怪得久唔久就有職員罷工。」
最近兩位老友嘅mentee（佢哋做大學生嘅mentor）分別得到牛津與劍橋取錄為博士生，但費用要兩萬鎊一年。唔易負擔，老友正周圍打探有冇獎學金可以畀mentee申請。律師H與左丁山都話：「既然你哋嘅mentee讀書成績優異，不如申請美國一流大學嘅博士課程啦，譬如耶魯、史丹福一類，所有取錄嘅博士生都有獎學金與TeachingAssistant嘅職位，令博士生讀書無憂。但牛劍就未必有錢畀。」
英國本土學生嘅大學學費特別便宜，國際學生學費就貴兩三倍，故此牛劍等名校錄取國際學生比較寬鬆，希望攞到高學費嚟津貼本地生。香港學生如果家境不算富裕，去英國會捱得好辛苦，如果喺大學攞到高GPA嘅，申請美國大學研究院係一個更好選擇。
學校有錢不是萬能，學校冇錢，萬萬不能，冇錢就冇研究，冇研究何來學術突破？彭定康做咗牛津大學校監之後，認識清楚，故此不斷以佢嘅身份地位，周圍搵富豪捐錢，你話牛津係唔係庸俗化呢？牛劍再唔學習哈佛耶魯向錢看嘅話，一定喪失競爭力。新加坡政府嚴密控制教育，過去十年，不斷向大學注入更多資金，而香港特區政府就不斷向大學削資，你話本地大學如果唔籌款嘅話，輸晒畀新加坡啦。