之達：我老死阿King調咗去外國做嘢，呢兩日返香港陪女友Victoria，想話問我借架車同女友去沙灘玩喎。哇！我當架車係老婆咁錫，梗係唔制啦！
MT：好心之達咪咁孤寒喇！不過問人借車的確幾難開口，不如租車仲好，最平$490就可玩1Day，開篷車都係$1,000咋！
記者：周達之、梁美甜
攝影：伍慶泉
演出：King、Victoria
打電話、上網都租得
租車的確係幾方便，好似阿King咁，隔幾個月先返嚟一次，唔通真係養住架車嚟用嗰一兩日咩！所以佢今日就幫趁租車公司租架車嚟同Victoria去赤柱游水曬太陽。家陣租車真係好方便，打電話、上網，或者親身上租車公司辦手續都得。申請人須備：
．2年以上車牌（國際牌都得）
．年過25歲 ．住址證明
「周末租」最抵：除日租外，仲可揀租1星期、1個月，甚至1年。抵玩啲可以揀「周末租」，即係由星期五中午12點至星期一早上10點，租金一般計你兩日多啲啲，但就可以玩足三日，以HondaCivic為例，日租$490，周末租$1,200，比起逐日計慳咗$270。
有車無車都租車
考慮咗一輪，阿King決定浪漫一番租咗部VWGolf開篷車嚟威威。5分鐘就辦好手續，隨即去停車場攞車，同Victoria直奔赤柱享受陽光海灘！其實未必一定無車先走去租車，就好似開篷車咁，大可Mood到時租番架嚟浪漫一下，唔使特登買架嚟威吖嘛！
租車疑問話你知！
有損壞點計？
以專業人員評估維修費，喺按金及保證金扣除，扣盡都未夠就要再補錢，Totalloss嘅話就最多要賠$15,000至$35,000，視車款而定！
MT：專人評估損失都幾合理，但如果我撞爛人哋架車，租車公司都派專業拗數員幫我同人哋拗數就最好。
之達：最好我自己搵師傅修理番，小記識人平啲吖嘛，不過睇怕租車公司都唔肯㗎喇。
抄牌邊個負責？
由租客自行繳交罰款，亦可以叫租車公司幫你交，但要畀多$200手續費！但如果係租車連司機就由租車公司負責番！
可否中途換車？
一般可以俾客人於租車期間換另一部車，不過由貴轉平車款係無得補番個差價！
可以喺邊度交收？
客人可指定在任何地方交收，但要收番$280手續費。
有無大陸車牌嘅車租？
因為大陸牌係跟司機而唔係跟車，所以惟有連司機一齊租。
油錢點計？
架車會入滿油畀個客，客人還車時亦要入番滿油，否則就會以當時油價收費，另加$50手續費。
撞親人點辦？
都係跟番汽車嘅第三者保險條款嚟辦事，不過醉酒駕駛撞親人嘅刑事罪行就梗係租客自己上身喇！
MT：呢條問題好多餘，不過張相又影得幾滑稽，請留意扮被車撞親嗰個其實係之達。
之達：連刑事罪都可以搵租車公司頂嘅話，咁就天下大亂喇！
唔使長期養住架車都可以隨時同女朋友揸架車出去玩，幾Free！
VolksWagenGolf2.0開篷版
呢部開篷車係VWGolf2.0，馬力有150匹，新車價要成23萬，家陣$1,000就可以租足一日任玩，認真超值。
Corolla
想平平哋租架車，不妨考慮呢部豐田Corolla，日租只係$490，係咁多款之中最便宜嘅一部，一家大細去玩最啱。
BenzE280
要出席啲重要場合，不如就揀呢部BenzE280，係就係貴咗啲，要$2,800租一日，不過行出街夠體面喎。
查詢：大昌行汽車租賃服務（27682277）
網址： http://www.dchml.com.hk