皇家馬德里前鋒羅賓奴，細細粒成日被人恰，巴西足總周二就落「柯打」，如果佢唔即刻歸隊備戰美洲國家盃，呢個賽事就唔使旨意打嘞！之但係，皇馬周日對馬略卡場波，係關乎聯賽冠軍命運，你話羅賓奴係咪好左右做人難呢？今屆美洲盃，唔使預佢囉。
或冇份踢美洲盃
我求大俠首先解釋下巴西足總嘅理據，根據國際足協條例規定，國際大賽開波前14天，各球會必須放球員返國家隊。巴西國家隊周二已經開始練波，皇馬就堅持唔放羅賓奴歸隊，巴西足總仲唔嘈鬼你咩！
規矩係死嘅，人係生嘅！巴西足總應該好明白皇馬嘅苦衷，呢類爭人糾紛佢哋亦試得多。
所以，今次態度咁強硬，好可能係卡卡同朗拿甸奴之前寫信請假唔打美洲盃，令巴西足總同教練鄧加覺得冇面，於是搵羅賓奴嚟出氣！
咁羅賓奴咪好無辜？係㗎喇！鬼叫你地位矮人一截咩！我求大俠覺得羅賓奴一於當乜事都冇，等球會同巴西足總談判；鄧加之前用巴廸斯達代替退隊嘅薛羅拔圖，已經冇其他實力球星可以代替羅賓奴，斷估巴西足總都唔會同美洲盃冠軍過唔去啩？
所以呢，羅賓奴最緊要係專心備戰周日嘅聯賽，幫球會重奪闊別3季嘅聯賽冠軍。正如佢經理人所講：「禮拜日場波肯定會打，呢場波係全年最重要嘅比賽。」美洲盃今個月26號先開波，使鬼咁早備戰咩？羅賓奴，我求大俠撐你！