夏天冬瓜當造，雖然其貌不揚但極有內涵：天時暑熱能清熱降火、生津解渴，又含多種維他命和人體必須的微量元素，有美白抗衰老作用，且含鈉量低，助去水腫一流，不只係消暑佳品，簡直係女士們的「恩瓜」……今日就教大家用冬瓜煮唔同菜式，食咗之後消暑解熱，人都靚啲。
記者﹕趙珮倩
攝影﹕陳盛臣
model﹕Peggy
點解叫冬瓜?
冬瓜盛產於是夏天，但點解叫冬瓜而唔叫「夏瓜」？原來冬瓜熟之際，表面會出現一層白粉狀的東西，好似冬天所結的白霜，所以冬瓜又叫白瓜。此外，切掉出來的冬瓜皮千祈唔好丟棄，據李時珍在《本草綱目》記載，用冬瓜皮煲水洗臉、洗澡，可使人皮膚白皙有光澤，而連皮一起煲湯飲，解熱利尿效果更明顯。
白玉葡萄
需時﹕45分鐘
價錢﹕$60/6人
材料：冬瓜41/2斤、雞湯1杯、黃耳碎3両（已發）、冬菇粒5錢、生粉少許、鹽/糖/生抽/豆粉各1/3茶匙
做法：先由冬瓜挖出小圓球，以雞湯蒸5分鐘至半熟，攤涼備用；黃耳碎/冬菇粒以鹽/糖/生抽/豆粉略醃；將冬瓜球拮小孔，小心釀入適量黃耳碎/冬菇粒，然後再蒸至冬瓜熟透，最後以雞湯/生粉埋薄芡淋上面即可。
麒麟科甲瓜
需時﹕25分鐘
價錢﹕$20/4人
材料：冬瓜2斤、金華火腿片8件、生粉2/3茶匙、鹽少許、雞湯1/2杯
做法：冬瓜起皮切成蝶形，橫向再輕切一刀，拉油，以雞湯/鹽蒸8分鐘，倒起湯汁；將金華火腿片夾在冬瓜片中，以少許雞湯/生粉埋薄芡淋上面即成。
腿茸雞汁瓜件
需時﹕20分鐘
價錢﹕$15/4人
材料：冬瓜1斤、金華火腿茸少許、雞湯1/2杯、生粉2/3茶匙、鹽少許、芥菜8條
做法：冬瓜起皮切件，拉油，然後以雞湯/鹽蒸8分鐘，倒起湯汁；芥菜以雞湯煨入味伴碟，最後以少許雞湯/生粉埋薄芡淋上面即成。
八寶冬瓜盅
材料：冬瓜1/2個、雞粒/蝦粒/草菇粒/勝瓜粒/蓮子各1両、蟹肉2両、夜香花5錢、金華火腿茸少許、雞湯約11/2升、鹽適量
做法：冬瓜挖空心，均勻地於底面塗上鹽，倒轉冬瓜盅蒸15分鐘去除臭青味，注入雞湯於盅內蒸21/2小時，倒出，然後重新注入雞湯，再蒸1小時；將雞粒/蝦粒/草菇粒/勝瓜粒/蓮子汆水，蟹肉蒸熟，一同放入盅內，下鹽調味，最後將金華火腿茸/夜香花撒上面即可。
示範﹕帝京酒店帝京軒
（電話：26226161）
中餐行政總廚陶國檢
