周日晚上收到友人傳來短訊：「今晚宇宙大戰，火星人對土星人」，一頭霧水，斷估冇理由咁早飲大咗，回電追問之，友人答曰：「是夜法國公開網球賽，夢幻戲碼，一哥費達拿對泥地王拿度，兩人的體能及心理素質均已超越地球人，費達拿天份高，瓣數齊，腦筋轉數快，故稱之為火星人；拿度速度高，力量大，在紅土場稱王，故稱之為土星人。」原來如此。
一哥費達拿排名世界第一，就只差在從未在法國紅土場捧過盃，既生費，何生拿，拿度彷彿是費達拿生命中的剋星，只要在紅土場上碰頭，費達拿多數冇運行，今屆費達拿又落空了，難道生命中就是欠缺了這項錦標。未能完美？
拿度是女球迷心中的寵兒，說不上英俊，甚至有點像一頭猩猩，四肢粗壯，籮柚尤其圓渾有勁，女球迷說這種型格叫做Raw，散發着原始男性魅力，奇怪地覺得張學友很像費達拿，不在面相，在其味道，兩者對自己的要求極其嚴格，不是跟別人較量，是跟自己作戰，雖然已是王者，但仍然不斷嘗試新領域，學友在新國語專輯中初試唱Rap，像費達拿誓要征服紅土場一樣，不做到最好不罷休。
比賽開始前跟另一友人一同吃晚飯，友人吃得擒擒青說道要趕回家看電視，以為一定係睇法國公開賽，點知原來係趕住睇《師奶兵團》大結局，後生仔有火星人對土星人唔睇睇師奶，確係麻油伴辣菜，各有各所愛，吹唔脹亦掹唔長。