餐蛋治、茄牛通、沙嗲牛麵？No、No、No！邊個話走入工廠區就一定食得Cheap，淨係可以食茶餐廳？其實工廠區一樣有好嘢食，同樣可以食到靚菜式，仲係個新食潮，人人走入去食餐好。價錢貴？錯，去得工廠區，價錢就夠大眾化，平平哋都可以食到中環水準。
記者：梁學文
攝影：楊錦文
Model：Gigi
$100食法國餐無加一
行過你未必見到，就算你知喺邊度，都唔係咁易搵得到。唔係玩捉伊人，而係搵金禾田。金禾田位置極隱蔽，分分鐘行過咗都唔知。不過搵得到又食得到，就一定係如獲至寶，皆因係呢度可以搵到$68的鵝肝。金禾田的陳家熙師傅曾經喺唔同大酒店做過大廚，又喺蘭桂坊97做過，煮西餐就最拿手：「我以前做西廚出身，煮得最多係汁醬，其實歐陸菜都係我拿手好戲。」
金禾田唔單止價錢平，仲有好多特別的食材，好似冰島比目魚、巴西豬仔骨等，另外，呢度唔收加一，即係話可以慳番，換句話可以食埋個加一。呢度的平均消費約$70，就算食一個fullset連湯連餐飲，$100落到樓。
法式煎鵝肝砵酒汁黑厘子$68
50g，真係足足50g，唔係hardsell，呢度的鵝肝真係足50g，換轉係中環，無100蚊都唔可以食得到。再配黑車厘子，中和了鵝肝膩滯的感覺。
法式比目魚香辣雜果汁$62
比目魚由冰島入口，味道鮮甜而且肉質嫩滑。師傅用士多啤梨、香橙、菠蘿等等做醬汁，甜甜酸酸仲帶點辣，引出食慾。
法式羊扒亁葱紅酒汁$62
新西蘭羊扒夠鮮嫩，入口有些少羶，尤其係近邊位置，羊味更濃。紅酒汁入面有多種香料，令羊扒味道更加豐富。
金禾田（23455838）
地址：觀塘巧明街110號興運工業大廈
營業時間：8am-6pm（夜晚設包場服務）
座位：300個
七折平歎鮑參翅肚千萬豪裝
繼食神韜韜喺九龍灣工業區開店之後，香港十大名廚之一的幟哥都殺入觀塘工業區開舖。幟哥動用$15,000,000打造觀塘工業區的龍皇，同區對手無得比。唔單止新店豪裝之外，店內餐具亦係日本名牌，攞上手都好Feel好多。或者你會問：「喺觀塘區食飯之嘛，唔使用咁高級食具同裝修呀？價錢實唔會平。」如果咁諗就大錯特錯，因為龍皇主打用平價食鮑參翅肚，實行跟平嘢冇好唱反調。行政總廚梁仲權話：「我哋用咁貴嘅裝修同餐具，目標都係想啲客人食得舒服啲同開心啲。價錢方面我哋又唔會轉介去客人身上，我哋推行薄利多銷。」
獨家矜貴食材
講得主打平價鮑參翅肚同海鮮，價錢一定平過人，平均係外面嘅七折，權哥話：「其實我哋可以平，最主要係因為幟哥。幟哥經常飛去外地入貨，貨源靚價錢平。我哋好少賣廣告，將啲錢買食材或者減價，唔怕羊毛出自羊身上。」龍皇有好多獨家食材，好似今個禮拜推出的花雪菌同黃魚脊，全部都係矜貴材料，不過都係平平哋就有得食。
秋葵花膠雞扎$28
又花膠又鮮淮山，只係賣$28，去中環又點止呢個價？雞扎加入濃雞湯做汁，入口有陣好重的雞味。
花雪菌黃魚脊扣鵝掌$128
黃魚脊係俄羅斯的一種深海魚，內裏含25種氨基酸，比燕窩更多，營養價值高。入口味道淡，不過幾爽口。
花雪菌姬松茸燉雞$268
花雪菌其實係一種喺日本關東新潟縣至北海道之間高山生長的菌類，夏天就係成長期，入口菌味清香。配合老雞豬肉同姬松茸，味道清清哋。雖然話係兩位用，不過其實夠四人份量。（須預訂）
龍皇（29550668）
地址：觀塘開源道64號源成中心2樓
營業時間：11:30am-11pm、10am-11pm（星期日及公眾假期）
座位：400個
街坊都話筍
