近幾年政府賣地，次次發展商都爭崩頭，直到上個月初拍賣西九龍油麻地海泓道地皮，先至冇咁進取，搞到業界滿地眼鏡。
不過，喺賣地成績超理想嘅日子，當大家都以為樓價仲有排升，買地產股實冇死之際，原來多個發展商已經要托住自己公司股價，若果唔係，後果會點呢………
呢排新地郭氏兄弟連番增持，先係喺5月21號用每股93.33元嘅價錢，增持咗100萬股，可惜公司股價唔生性繼續下滑，上個禮拜五第五度增持時，每股用88.86元買咗60萬股（使咗5332萬），噚日輕微反彈都係得89.2元，埋單肯定蝕入肉。
近年不斷出手回購嘅地產大好友信和置業，今年股價喺1月曾經一度高見19.62元，但近月股價唔多妥，信置喺2月開始猛咁回購股份，但有啲托唔住嘅迹象，股價反覆下跌，上周五信置係咁意回購60萬股，使咗唔使1000萬，噚日信置輕微回升收16.42元，都仲係近月低位。
個個唔掂 得超人掂
講到最傷應該係太古，佢哋今年枕住回購，初期都頂得吓，股價喺4月一度升上93.9元，可惜後勁不繼，上個禮拜五豪擲1.28億元（每股85.8至86.2元）回購咗149萬股，但噚日都係收85.9元，睇怕都係反彈乏力。本來公司回購股份註銷，可以支持股價，但喺太古身上似乎唔靈。
咁多個發展商出手回購，暫時都係得長實主席李嘉誠最掂，噚日長實收102.1元，喺誠哥今年嘅12次回購中，有11次都係低過呢個價。不過，大家要記住超人唔係投機，只係對公司有信心。
[email protected]