時間：2001年12月28日
地點：長沙
人物：趙薇
經過：以前啲人成日話「嘢可以亂食，說話唔可以亂講」，其實說話固之然唔可以亂講，嘢都唔可以亂食，但係衫亦都唔可以亂着。好似趙薇咁，當年就因為亂着衫而闖禍。
2001年12月28日，趙薇喺長沙演出湖南電視台6周年台慶，當佢準備唱最後一首歌《愛情大魔咒》時，突然有一個手持膠樽物體嘅男人衝上台，佢一手推趙薇落地，又拉扯佢嘅頭髮，然後將用膠樽載住嘅稀釋大便淋向趙薇背部，10幾個保安即時制服個男人，趙薇就衝咗入洗手間大喊。原來嗰個男人好痛恨日本軍國主義，佢自稱祖父母俾日本士兵害死，知道趙薇之前着住日本軍旗服幫內地《時裝》雜誌影相後，於是就用淋屎方式嚟教訓趙薇，等佢當眾出醜。
趙薇一直唔肯回應淋屎事件，直至2002月1月3日，佢喺上海出席《天下無雙》記者會終於講述自己感受，佢話過去嘅事唔想再提，佢只係想大家知道佢身心都好健康。趙薇當年被人淋屎事件，亦正正畀佢知道衫絕對唔可以亂着㗎。
本欄逢周一至周六刊出