內地股市瘋狂，開戶人數突破1億，咁多新手入場，肯定想知道多啲炒股基本功，學咗贏面都大啲，唔使怕盲摸摸隨時輸身家。證券行梗係想招攬呢批人做客仔，咁生意自然會多啲；話唔定內地好快就會有新一代股神出現。
於是，國泰君安期貨拍住上海大眾同媒體，搞個「志在掌握」比賽，包括考參加者股指期貨知識嘅問答比賽，同模擬投資比賽，睇吓邊個知識豐富同夠眼光。
問答比賽部份，主辦單位每日會喺電視、網絡、報紙雜誌同證券行嘅營業廳公佈10條問題。
而模擬比賽就安排喺6月25至7月25號舉行，今個月20號截止報名。贏咗當然有獎品攞，Polo汽車、PASSAT汽車、筆記簿電腦同手機等。啲獎品由上海大眾贊助，華華睇過佢嘅網頁，原來佢哋宣傳旗下汽車嘅口號之一就係「志．在掌握」，贊助呢個比賽，睇嚟可收一舉兩得之效。
[email protected]