時間：2000年8月3日
人物：容錦昌
地點：西環順昌隆燦記麻油廠
經過：有麻油王子之稱嘅容錦昌，屋企人開麻油廠，雖然家境唔錯，但佢因為曾經飽受喪母打擊，再加上事業停滯不前，搞到成日借酒澆愁，諗埋一邊，結果諗多幾諗搞到腦都亂埋，同屋企人甚至警察大打出手。
話說2000年8月3日，容錦昌喺位於西環嘅順昌隆燦記麻油廠度，同佢哥哥發生爭執，搞搞下突然失去常性，拎住把遮追打哥哥，警方去到現場嗰陣，容錦昌情緒又不受控制咁打傷警員，搞到警員要出動胡椒噴霧對付佢，容錦昌經送院診治之後，再轉送咗去東區醫院精神科治理。
容錦昌留院5日之後出院，雖然佢當日聲稱係醉酒累事，又話以後會改過自新，但佢出院後精神狀況依然唔太穩定，3個月之後，容錦昌又懷疑因為服食過量藥物喺屋企昏迷，結果到咗01年10月，佢決定退出娛樂圈，幫屋企人打理生意。
不過，2002年9月，容錦昌又再惹下官非，有一位雜誌男記者報警，聲稱喺銅鑼灣時代廣場男廁小便時，俾容錦昌偷窺，最後因為證據不足而獲釋放。
本欄逢周一至周六刊出