無綫節目《謎》後日便播出最後一集，該節目播出以來，經常被彈內容不夠神秘及搜奇，而在節目內穿紅衣、粒聲唔出的「謎女郎」呂慧儀，更令不少網友及觀眾覺得她比節目內容更「謎」，各方意見好壞參半，所以本報特意找來謎女郎現身解「謎」。
冇對白
問：點解你喺節目《謎》裏面冇對白？
呂：因為秋官係我上司，我唔需要講太多對白，佢叫我做乜嘢我就做乜嘢，而且我係新人，有機會演出對我嚟講已經好難得，只要滿足公司要求，我會盡力去做。
似女鬼
問：點解要着紅色裙，你鍾唔鍾意紅色？
呂：節目裏面我係以紅衣女郎身份出現，因為監製覺得個背景係藍色，咁我着紅色去襯，效果會好sharp。我本身都好鍾意紅衫，不過節目着得太多，所以𠵱家都會着多啲唔同嘅顏色。
玩肉麻
問：覺唔覺得兩個男主持嘅名叫Adam鄭及貽興王好肉麻，你叫佢哋個名時有乜嘢感覺？
呂：一啲都唔肉麻，初初叫嘅時候係有少少唔慣，不過叫多幾次之後就好有親切感，好似叫一個好好嘅朋友咁。
唔神秘
問：節目《謎》裏面所謂嘅「謎」，好似好多人已經知道答案，感覺上有少少過時，會唔會一啲都唔「謎」？
呂：事實上所有嘅謎都係以前流傳落嚟，咁我哋都會提出人哋破解嘅答案，仲會有少少實驗去證實，最後當然要有人依番《謎》嘅作風，等大家去思考喇。
開金口
問：聽講喺後日嘅最後一集你終於會有一句對白，等咗咁耐先有對白，有乜嘢感覺？
呂：其實平時都有對白，不過就係好短嘅英文句子，咁最後一集係會有一句中文嘅對白，當然要貫徹「謎女郎」嘅作風，所以都只係一句好短嘅對白，因為之前都係講英文對白，最後要講中文係有少少唔慣。
道具夾
問：每集都攞住個機密文件交畀男主持，咁裏面到底有冇文件，定係空嘅？
呂：文件係道具部預備嘅，裏面係有一啲資料性嘅文件喺入面，除咗文具之外，我都會攞一啲道具畀佢哋。
邊個型
問：你覺得兩個男主持邊個比較有型同吸引？
呂：我會揀秋官囉！咁佢經驗豐富啲，佢可以教我好多嘢，我都好想可以再同佢合作，希望到時可以用中文同佢交流。
人物誌：港姐季軍冇工開
擔任「謎女郎」的呂慧儀乃06年港姐季軍，現年24歲，04年代表威馬企業有限公司奪得工展小姐冠軍，同時也是Elite模特兒公司的模特兒。呂慧儀當選後一直被投閒置散，上月播出的新節目《謎》是她的首項工作，雖被網友狂插「謎女郎」似女鬼及角色可有可無，但也因而令其人氣急升，成為話題人物。
採訪：王崇穎
攝影：仇志德
髮型：SteveHaiR
