無綫劇集《歲月風雲》噚日拉隊去上海同北京宣傳，成班演員嘅緋聞關係圖，連當事人嘅苗僑偉（三哥）都話七國咁亂。其中苗僑偉分別同梁靖琪（Toby）、佘詩曼傳過，佘詩曼又同馬德鐘傳過，真係好難釐得清。
噚日三哥最早到機場，佢一見Toby就好開心咁話：「你咁大個篋，去四日咋，唔係去四個月呀。」後來阿佘一到，記者要求三人合照，三哥就好避忌咁拉埋鄧萃雯，搞到雯女口噏噏咁話：「又搵我嚟搞。」馬德鐘就全程做獨孤精，冇人理。
Toby甘做擋箭牌
呢日唔見三哥老婆戚美珍，佢話老婆唔會去，仲話：「乜都有得講，嚟又話監場，唔嚟又講第二樣。」佢強調同Toby、阿佘嘅緋聞都係無中生有，仲話唔會避忌，因為大家知冇嘢，講得興起仲話：「今次真係七國咁亂，三人行呀，唔止，仲有雯女，一行十幾人。」
有傳三哥送99支玫瑰畀阿佘，Toby話：「我有睇，好好笑，我叫佢要送110支畀我。」佢仲話會幫三哥手擋緋聞㖭。阿佘就大歎緋聞係煲水，佢話玫瑰花係另一個朋友送，三哥送利是畀佢，又話成日見到戚美珍探班，照顧得三哥好好。
