《溏心風暴》全城熱爆，就連離開無綫超過15年的《歡樂今宵》元老盧大偉也看得牙癢癢，揚言恨演大鮑夏雨的角色。盧大偉80年代以玩「食」字笑話帶給觀眾無限歡樂，不過他與嚴肅的汪明荃合作時，就不敢亂爆肚。今年63歲的他，專訪當日甫坐下便告訴記者他是「兩個背脊的駱駝」，即是雙峯camel──傷風感冒，果然寶刀未老。自言是個開心快活人的盧David，笑「joke」數十年仍未言倦。撰文：戴彩煥
麗的映聲（亞視前身）第二期藝員訓練班學員盧大偉，1968年與李司棋和黃淑儀同期受訓，他跟大哥盧遠和二哥蕭亮是電視界頗有名氣的「盧氏三兄弟」；1975年，盧大偉獲周梁淑怡邀請下加盟無綫，拍攝過《功夫熱》和《相見好》等劇集，於70年代末期加入《歡樂今宵》主持行列發放笑彈；90年代中，百足咁多爪的他離開無綫，開設製作公司大過老闆癮。
波叔火燒木人巷
《歡樂今宵》滿載香港人的集體回憶，身為元老的盧大偉也覺回味無窮：「當年波叔（梁醒波）好頑皮，有次丁羽排完劇瞓喺木人巷，木人巷有啲好似醫院嘅屏風喺度，波叔就搵啲屏風圍住丁羽，然後搵啲紙擺喺佢身邊點火燒，一點火丁羽就驚醒咗，以為自己點解瞓喺醫院，我見到笑到趴喺度。仲有一次好好笑，張瑛都做過《歡樂今宵》，雖然我未同佢合作過，但我聽聞佢試過講講吓嘢成棚假牙飛咗出嚟，佢即刻一手執番拍番入口繼續講，真係冇得頂！」
80年代，《歡樂今宵》藝員各具特色，除盧海鵬爆笑扮嘢功夫和押韻對白外，盧大偉的「食」字笑話也令觀眾笑破肚皮，不過，他這個拿手好戲，並非人人欣賞，阿姐汪明荃便是其中之一。
盧大偉說：「當年阿姐冇𠵱家咁開放，佢好認真，覺得我哋成日嘻嘻哈哈，講埋啲無聊笑話，佢冇嗰啲幽默，好似我話：『banana』，即係『笨吖嗱』，但阿姐話：『banana有乜咁好笑！』好多時我自己覺得好幽默，唔知人哋覺唔覺，記得有次我扮病人，又包晒紗布又戴帽，個造型好似電影《象人》（TheElephantMan）咁，我對白方面就玩字話：『我都病到唔『象』一個『人』啦！』我自己就笑得好開心，但其他人就唔知我講乜。」
與阿姐合作10多年，可曾試過玩出火辣㷫阿姐？盧大偉說：「唔會，我哋唔敢搞佢，阿姐當年出咗個『不正不接』嘅例，劇本寫明『你好嗎？我很好！』你唔講『你好嗎』，佢係唔會接落去，就算你講句對白係咁上下意思，佢都唔『老利』！」
隨時挑戰詹瑞文
盧大偉不諱言，當年《歡樂今宵》藝員經常爆肚，無非因為忘記對白，至於令觀眾笑破肚的扮嘢演出，更是即食兼求其之作，下午接通告，晚上便演出，根本沒太多時間作準備，盧大偉說：「我扮過夏韶聲唱《空櫈》，又扮過谷村新司同西城秀樹，其實只要你捉到嗰個人嘅幾個特點就可以做到出嚟，你𠵱家叫我扮陶大宇扮詹瑞文，我都扮得到㗎！我覺得showbusiness真係好好玩，𠵱家睇見李司棋、夏雨個個做到咁過癮，我都好想跳番入去做個角色。」
《歡樂今宵》迎台慶
無綫計劃今年10月再做20集《歡樂今宵》迎台慶，力邀各大元老歸隊，盧大偉便是其中之一，不過，回巢與否，他仍未決定，盧大偉說：「睇吓擔綱啲乜嘢，如果畀個鮑鮑我做梗制啦！又或者主持一個好豐富獎金獎品嘅節目，我都鍾意做，但如果做《歡樂今宵》是但一個藝員，今日扮乜扮物，我就唔係太有興趣啦。」盧大偉認為，再做《歡樂今宵》一定要加入新的元素，正如日本綜藝節目如此成功，一直深受觀眾歡迎，無非是節目經常保持新鮮感，否則只把經典環節重新包裝，只會吃力不討好。
後記：
盧大偉是名副其實的口水佬，10多年前記者跟他面對面做訪問時，便曾眼巴巴看着他一大滴口水有如射12碼般直噴入記者口中，雖然當時記者第一時間衝入洗手間漱口清潔，但仍洗擦不掉心中那陰影。今次盧大偉重遇記者，還抵死地笑問可曾懷念他的「人窩」！為免重蹈覆轍，記者還是坐在他側邊以策安全。
攝影：陳慧安
盧大偉隨心寫笑話
最拿手玩「食」字笑話的盧大偉，原來不論何時何地也會隨身袋着一本小小記事簿，每當他忽然想到甚麼玩「食」字的笑話，他便會即時記錄下來，數十年來皆是如此。以下是盧大偉部份得意之作：
1〉「邊種動物唔以父母為榮，係以兄作父？答案係雞，幾時見過啲雞講『爸爸媽媽』？佢哋只會『哥哥（咯咯），哥哥（咯咯）』咁叫！」
2〉「獅子老虎好鍾意同人溝通，求知慾好強，你攞相機去到動物園對住獅子老虎影相時，佢哋會問你究竟點影：『how（吼）how（吼）』。」
3〉「隆胸隆一對價錢一萬，但隆一邊嘅話並唔係一半價錢5千，3千就可以，因為合約寫明『一波三折』。」
4〉「有人想開拍一部《無間道警犬》，於是搵老細投資，但當老細知道古仔之後即刻唔制，因為古仔係講『搵狗扮賊』。」
5〉「食煙仔辣親手指罅──煙仔俗稱鏹，支鏹燒到辣親手指罅，即係燒到盡頭──牽鏹（強）到盡。」
6〉「花花草草嘅花識得做乜嘢？原來係花識（式）溜冰。」
