昂坪360前晚發生嚴重意外，一輛運行中嘅吊車墮下，跌落赤鱲角機場島嘅草叢，車廂爛到變成廢鐵，好彩當時吊車停止服務，冇人受傷，不過港府已即時勒令吊車無限期停駛。
挽市民信心
之前有唔少藝人都坐過昂坪360，無綫長劇《珠光寶氣》演員王喜、大契李司棋同蔡少芬早排坐吊車去寶蓮寺拍劇，前者上月曾再坐吊車接受本報專訪。馮仁昭噚日打畀王喜，佢就話坐兩次都行程愉快：「噚晚睇電視知道呢單新聞，覺得幾牙煙，但任何交通工具都有出事嘅可能，所以政府真係要嚴審吊車系統，為咗挽回市民信心嘅話，我願意再坐。」
大契就話暫時坐360都係咪預佢：「我拍《珠》劇時第一次搭360，平時我搭呢啲會驚，唔係因為拍戲都唔會搭。上次坐覺得幾得意，仲諗住下次約埋家姐去昂坪再玩，𠵱家都係等吊車整番好先啦。」至於蔡少芬曾經喺佢個blog（ http://blog.sina.com.cn/u/4c0aec55010009j8）上載坐吊車後嘅相，仲形容「坐吊車係好好玩，有機會都要帶朋友再去玩吓。」唔知𠵱家佢嘅態度有冇改變呢？
胡杏兒舊年都帶過長者坐360，身在上海嘅佢噚日就話：「嗰次坐吊車覺得好定，今次意外好彩冇事，我諗都要等政府整番好先會再坐過。」
