俾證監會勒令停牌超過3年嘅華燊燃氣，𠵱家都拎唔出04年結盤數，當然復牌無望。之不過，佢哋嘅第二大股東、持股22.97%嘅天津發展，本身就有啲人事變動，王廣浩自5月初劈炮唔做主席，當然冇乜理由仲留喺華燊做執董，連同津發嘅另一插旗代表張鴻儒，一併喺6月9日起辭職。呢兩個空缺，一個由津發嘅另一名董事戴延繼任，另一個就由今年3月加入華燊做首席財務總監嘅林萬鐮頂上。
唔講唔知，林總監接手呢個爛攤子之前，曾經喺德昌電機、摩托羅拉亞太區擔任高職，最近嘅嗰份工係喺04至07年擔任領匯嘅財務總經理。領匯近年雖然多風多雨，但點都唔夠長期停牌嘅華燊，今次佢肯加盟，唔通華燊復牌有望？咁就真係要放長雙眼睇吓。
[email protected]