上流社會啲所謂第二代，同埋啲所謂明星，唔理男定女，錢多時間多，好多時真係玩到冇得玩，玩到自己嘅性取向都轉埋！好似香港其中一個老牌錢莊家族咁，由於家族長老驚住後人富不過三代，就實行大鑊飯制，每月出糧畀啲子孫，所以個個唔使做都可以過上等生活，亦都係咁，無論男男女女，好後生嗰陣就乜都玩過晒！
玩得多都會悶，加埋成日群住光怪陸離嘅娛樂圈朋友，其中一個女後人，好快就變咗TB（即係tomboy），起初都有換吓「女朋友」，但最後揀定咗唔後生唔靚女嘅「殘片公主」，令到班一心諗住埋身嗗佢水嘅明星、暗星為之意外！
搵男子漢做煙幕
呢一對嘅穩定程度，真係出乎意料之外！錢莊後人成日有女埋身，「殘片公主」響中坑至老坑界別亦非常有市場，但咪理，咁多年以來，只係試過有一排因為驚大家關係揚得滯，「殘片公主」至搵「男子漢」做場戲，扮煙幕追求者，查實兩個人都非常忠於伴侶！比起𠵱家啲人郁吓就掟煲或離婚，佢兩位都算得上細水長流！
[email protected]