除咗飲酒同藥物之外，眼瞓揸車亦係極之危險嘅事，我悠穎馳揸車都係為興趣，眼瞓可以改搭的士，之但係職業司機就唔同，職責所在，眼瞓都要揸，結果就係咁出事。
亦因為咁，所以日本一家汽車零件生產商，最近就推出咗一套警告系統，利用一個Cam仔嚟捕捉影像，然後再由電腦以行車速度作分析，當發覺自己部車會喺接近前車1.5秒時就會自動發出警號嘈醒司機；或者你會問，得嗰1.5秒夠唔夠呀？但其實根據歐洲做嘅調查報告顯示，發覺司機只要喺1.5秒前意識到危險，就有足夠時間踩Brake嚟避免90%嘅意外。不過呢套系統亦有個盲點，就係只可以認到車，唔可以認到人或單車。
不過我悠穎馳心諗，眼瞓呢家嘢，要瞓起上嚟真係打雷都未必聽到，咁不如掉番轉嚟諗，用個鏡頭嚟Check吓司機眼唔眼瞓，一Check到就即刻自動停車仲好喇！
悠穎馳
豪邁不羈，愛車如命，聽幾下引擎聲就知咩車！