喺台灣生產電腦零件做到出晒名，喺香港就因為同嘉玲姐嘅緋聞，而路人皆知嘅台灣首富郭台銘，之前仲俾發現「人逢喜事後生咗」，唔只白髮變黑，連臉上黑斑都走埋，白淨晒，唔知係咪呢次經驗，令郭生發現醫療護理大有商機，佢上個禮拜五喺鴻海股東會上，公佈今年會撈多瓣──搞埋醫療護理，已四出拜訪過唔少客戶，唔係得個講字。
細佬患癌見商機？
郭生向台灣傳媒話，醫療器材產業的利潤高，以鴻海多年累積嘅經驗及技術，喺醫療產業方面都會有好好嘅發展，仲話，如果可以用PC嘅成本打入醫療產業供應鏈，咁就好和味。
不過，呢個商機，亦可能係郭首富細佬郭台成帶畀佢嘅，本來係鴻海接班人嘅郭台成，因為患咗血癌，辭去所有職位，𠵱家喺北京養病。做兄長可能因為咁而注意到醫療產業商機無限，郭台銘仲講過，鴻海發展第七個醫療產業和慈善事業，第日會交畀細佬負責，睇嚟，郭生都好重手足情。
[email protected]