財經界呢期最紅肯定係佢！華華上個禮拜三先講過，人稱「股壇長毛」嘅港交所獨立董事DavidWebb搞革命，吹雞叫小股東否決王氏港建曲線私有化。話口未完，Webb哥又單人匹馬殺入地鐵嘅股東會，狂插地鐵延長唔加價嘅承諾，對派息好有影響，擺明對兩鐵合併投反對票。
茶敍口密 暗示實掂
其實，地鐵食粥食飯主要靠物業發展，票價收入係芝麻綠豆事，Webb哥支笛未必多人聽。反而王氏港建就頭痕得多，今鋪抄電盈曲線私有化SUNDAY條橋，向主席王忠桐賣斷資產後除牌，向每名股東每股派1.65元，𠵱家單憑Webb哥一人，可能已經過唔到關。話說早前王氏港建自己爆料，話Webb要求私有化加價，管理層同Webb仲舉行鴻門宴，但最後傾唔掂，但王氏嘅公告冇講Webb要求幾錢。
咁犀利，華華即刻約Webb哥歎茶敍舊，順便索多啲內幕料。點知隻衰鬼口密到不得了，只係話揸住嘅股份，不少於聲稱嘅3.16%，亦唔多於5%（難怪王總喺股東名冊搵唔到Webb哥啦！），但就已經聯絡咗其他股東，暗示要反對嘅話一定掂。
不過，佢揼咗份研究報告喺webb-site.com，Webb哥好勞氣咁講，王氏港建過去4年純利由2200萬元增至2.5億，每股1.65元作價只係現時公司資產淨值嘅1.1倍，太過搵笨，合理估值應係3.16至3.45元之間，至保守都要3蚊，如果擺和頭酒，每股唔過2.5元唔收貨。
星展亞洲易有衝突
王氏港建話每股1.65元係獨立財顧星展亞洲融資提出嘅，私有化條款非常合理。Webb哥就話，王氏舊年直接私有化嘅作價，每股1.38元亦係星展融資出嘅，而佢哋嘅母公司星展銀行同王氏港建不嬲有往來關係，係人都諗到好容易有利益衝突啫，咁有幾獨立先？
[email protected]