時間：2000年7月2日
地點：九龍灣國際展貿中心
人物：髮型師張國強（Boffy）
經過：曾經有一段時間，娛樂圈藝人好興去raveparty，佢哋都蒲得好行，先後同葉玉卿拍拖，同張文慈傳緋聞嘅髮型師張國強（Boffy）一樣係蒲精，最鍾意去raveparty耍樂。2000年7月，Boffy着住背心、短褲同腳踏拖鞋去咗九展一個raveparty，同場仲有黃家強、徐濠縈同麥家琪，場內播行勁歌，氣氛梗係high爆會場。
最搞笑嘅係喺中場時，打直入去嘅Boffy，打橫暈咗俾幾名保安抬咗出嚟，佢當時連拖鞋都甩埋，要保安人員幫佢暫時保管住，認真瘀爆。場外記者見狀，當然立即上前爭相拍照，可能係鎂光燈係咁閃嘅關係，Boffy竟然好神奇咁醒咗，佢話：「乜嘢事？」仲怪啲保安點解將佢抬出嚟，又係咁問人攞番對拖鞋。
保安人員發現Boffy臉上有傷痕，問佢傷勢如何？佢就話：「冇？俾番隻拖鞋我。」問到Boffy係咪玩得太high所致？佢又話：「唔係，我喺入面瞓咗，我都唔知點解瞓咗？仲俾人抬出嚟。」Boffy嘅行徑，真係令人摸不着頭腦。
本欄逢周一至周六刊出