今年2月前稱中糧國際嘅中國食品（506）分拆旗下生物能源業務中糧控股（606）上市，除淨前股價係9.79元，除淨日收報6.18元，分拆部份大約值3.61元，與中糧控股招股價3.72元相差無幾。呢隻中糧控股3月正式掛牌，首日已急升近50%，收報5.53元，由於中糧控股係以實物1對1方式派送，股東除淨當日即沽貨，淨係分拆呢舊嘢每股賺1.92元。
呢個分拆消息，其實早於去年中已廣泛流傳，至10月才正式公佈，若投資者在公佈後入市，以6元左右買貨，分拆前炒上近10元計，賺得仲多。炒分拆咁好賺，仲有無咁嘅機會？新世界發展（017）剛建議分拆新世界百貨，根據通告載，只預留了2028.5萬股予現有股東優先認購，按每182股可認購1股基準，持有182萬股新世界至得1萬股咁大把，計落同中糧嘅分派方式係差天共地。
反而同樣係分拆替代能源業務上市，搞緊風力發電嘅香港建設（190）更有憧憬價值。管理層個零星期前表示，有意將風力發電、垃圾發電及生物發電等多個替代能源業務分拆上市，地點會在香港或美國，最快年底前落實。參考中糧嘅例子，呢個時候已經可以密密收集港建，坐定定等分拆。
聯康整固完再上
上星期講過唔少內地醫藥股仍然遍地平貨，近年積極發展醫療業務嘅聯康生物（690）本月初忽然爆上，之後喺5蚊水平橫行整固咗幾日，以該公司近期舉動，包括安排基金經理往常平睇廠，及盛傳引入歐美基金入股睇，炒作應該未完。睇過勤+緣（2366）炒高逾倍配股，聯康再炒高3、4成俾基金都唔奇。