華懋集團老闆龔如心（小甜甜）過身後，留低千幾億遺產，當龔家後人同風水師陳振聰為爭奪小甜甜嘅遺產，而要隨時對簿公堂嘅時候，最近又有傳聞話呂良偉會分到小甜甜嘅遺產，仲話佢已經收到相關法律文件。
阿呂日前喺上海擔任《加油！好男兒》嘉賓時，俾內地記者追問起呢件事，佢話：「純屬無稽之談，所有傳聞都是無中生有，不要再問了，我以前說過了。」
「我們根本不認識」
雖然阿呂已解釋過，但傳媒都係咬住唔放，卒之搞到佢攤晒手，有啲激動話：「隨便你們怎麼說、怎麼想，我和小甜甜根本不認識，她根本沒必要把遺產給我。如果實在要說有關係，大概是我們經常關注慈善事業，我們都是相信好心有好報，都非常樂意幫助有需要人士。」後來北京《新浪網》記者再訪問阿呂，佢話：「我沒有為這些傳言不開心，只是不想再回答，我只希望她一路走好，讓她安息吧！」