已有一段時間沒有在香港推出唱片的蘇永康，昨日聯同梁漢文、傅穎以及吳雨霏，到黃埔出席簽名會，擔任司儀的是曾與康仔傳出緋聞的歐綺霞（Monique），不過康仔揚言已忘記與對方的緋聞。
蘇永康、梁漢文（Edmond）、傅穎（Theresa）以及吳雨霏（Kary），昨日到黃埔出席「芝華士金牌『醇』音樂會DVD專輯簽名會」，而擔任司儀的是康仔前緋聞女友歐綺霞。事後問及康仔兩人同場有否感到尷尬，他表示：「唓，有乜嘢咁尷尬呀，係你哋記性好，唔講我都唔記得，我哋之前都有喺工作場合見過面。」
低調處理感情
記者追問康仔現時的感情生活，他指自離婚後不再提感情事，他續說：「我當年喺網上宣佈結婚，離婚就開記招，我唔想再將私人生活曝光。」康仔又強調對婚姻存有陰影，故暫時不考慮再婚，他說：「我03年5月30日離婚，如果我拍拖嘅話，會同另一半講清楚低調處理感情事。」另外，康仔的經理人黃柏高（Paco）透露今年會為他推出廣東碟及舉行演唱會，他強調對康仔的事業充滿信心。
戥湯寶如高興
對於早前有報道指湯寶如已懷有身孕，身為舊愛的Edmond表示都得知此消息，戥對方高興，他說：「我知佢一直都好想有BB，希望佢生個健健康康嘅BB。其實之前我哋住埋同一座大廈，住樓上樓下，有時搭𨋢會見到，但係我已經唔見咗佢個電話，遲啲會問蘇志威攞番佢個電話，等佢生咗時恭喜佢。」當記者向Edmond透露湯寶如的男友是賽車手時，他即時笑說：「我係足球員都好勁㗎。」
此外，Kary透露於日前的生日會上，收到一份由男性好友所送的Prada電話，但她之後又補充對方絕對不是追求者。
採訪：李珮洳
攝影：仇志德
