前晚瓜德羅普喺金盃贏加拿大2:1，爆咗個越賣越冷嘅6.5倍冷W出嚟，唔少人都俾呢塊西「瓜」皮跣到攤攤腰；經我求大俠明查暗訪之後，發現呢個加勒比海島國一啲都唔嘢小1，仲要係卧虎藏龍嗰隻，而幫瓜德羅普入第1球嘅，就正正係馬賽同華倫西亞名宿安高馬。
𠵱家41歲嘅安高馬，後生嗰陣時打後衞代表法國踢咗37場國際賽，照理唔可以幫第2個國家比賽。但佢嘅出生地瓜德羅普唔係國際足協會員國，而且金盃只係地區性賽事，所以安高馬就獲准為瓜德羅普出戰金盃。講番𠵱家轉咗型打中場指揮官嘅安高馬，佢獲獎無數，攞過法甲聯、西甲聯、歐聯同埋U21歐國盃等錦標；而我求大俠仲好記得佢打華倫西亞時年紀唔輕（32歲踢到37歲），但都搶到個正選位，所以絕對係個殿堂級嘅球員。
出產唔少法國球星
睇番瓜德羅普今屆參加金盃嗰陣，仲有唔少好手喺度，而且仲要係歐洲頂級聯賽踢波，好似後衞蘇美爾就踢緊下屆由英超聯降落英冠聯嘅錫菲聯，而門將格蘭廸同前鋒洛華就一齊效力荷甲聯嘅烏特勒支，睇嚟呢班波真係唔係吳下阿蒙。話時話，原來好多法國國腳都係祖籍瓜德羅普，例如係占邦達、杜林、加拿斯、施維斯達同埋韋托特等，如果佢哋下屆齊齊幫瓜德羅普，我求大俠相信喺金盃一向也文也武嘅美國同墨西哥，應該有得震冇得瞓。