原來好多人同阿Net一樣，都覺得韓星私底下好老友，唔似得日本或者荷李活明星口和心不和。最近內地網站韓劇社區就有個「韓國藝人私下好友」嘅討論，刊登咗唔少韓星私底下嘅合照，其中車太鉉人緣最好，同好多明星都好friend。
車太鉉早年同Rain合作拍攝服裝廣告而成為好友，佢哋仲曾經一齊去遊樂場玩兼同史力加影相㖭，車太鉉咁好人緣，唔怪得上年佢結婚時邀請到過百位圈中人參加，𠵱家又同安在旭拍檔主持電台節目啦。至於本身亦係車太鉉老友嘅組合FIN.K.L成員成宥利、玉珠鉉同李真，原來又同宋慧喬好老友，仲不時自拍留念㖭。
金三珣私會型男
除咗車太鉉外，金宣兒人緣亦非常好，除咗同佢合作過《我係金三珣》嘅玄彬外，型男公侑、趙寅成同姜東元都經常同佢食飯。玄彬就因為處境劇《Non-Stop4》同神話Andy同JunJin成為好友，討論區有張相仲係玄彬幫Andy擦背，不過阿Net就覺得張相似劇照多啲。至於女星金荷娜同孫藝珍，歌手BoA同MinWoo，好似大纜都扯唔埋，但私底下都好老友。
網址： http://www.kdocn.com/bbs/thread-236612-1-1.html
版主：阿Net
本欄逢周一至五刊出