電單車大致可分為跑車、越野、街車、巡航和綿羊五大類，近年較多人玩的車種也莫過於後兩者；巡航車（Chopper）可跟車主意思，喜歡怎樣改裝也可以，完全反映出車主本身的個性，而綿羊仔除了大受女士們歡迎外，亦是愛「潮」年輕一族的恩物。Honda有鑑於此，近年推出了一款貌似Chopper的綿羊仔PS250，務求一擊即中地令巡航和綿羊的Fans也甘拜其石榴裙下！
文：TigerL
攝影：伍慶泉
模特兒：Maggie、Tasha、Stanford
綿羊Chopper 性格集一身
Honda在04年首度推出的PS250，具備了方形頭燈、粗獷外露的鋼管車架、有工程車Feel的橙色車身，外觀雖看似有點怪怪，但物以罕為貴，它的出現已深深地打動了一班喜歡特別車款人士之心，去年Honda再下一城，除將頭燈改成雙圓設計外，還加入流行的軍綠、卡其和黑色等3種顏色，而其餘的配件仍被保留下來，如只有Chopper才會裝設的大腳踏、可作前後調校的座椅，令雙腳可略放近車頭，不像一般綿羊較垂直的坐姿，像巡航車一樣，腳放前而背能斜靠後，令舒適性提高。
然而，PS250的最大優點是靈活性和載貨量大，就算你是新牌仔一名，PS250的操控也會令你感到得心應手，因車身較同級的綿羊略短，而將椅背掀起後，車尾馬上變成超大載貨空間，正宗載人載貨一樣掂！
Tasha：「型Look加長腿襯到絕！」
擁有修長美腿的Tasha，初嘗PS250後的第一個感覺就是「型」，像街車的高手把、大型的踏板，令Tasha可以坐得舒舒服服，仲可以Show美腿，「我最鍾意佢有泊車手掣，當架車停喺斜路度，唔需要太用力去頂住架車；雖然車身對男仔嚟講唔算重，但係我始終係女仔，一唔小心溜後或者跌車就好麻煩。架車仲畀我好『肌肉』嘅感覺，無多餘嘅Fairing；車架外露好特別，從來未見過有電單車係咁，入油就喺座位前嘅踏腳位置，入緊油都唔使落車好方便。好多朋友都話我揸PS250好型㖭！」當然喇，有Tasha一樣的美少女坐喺度，難道在街上的收視會低得過《溏心風暴》嗎？
Maggie：「座椅可變成一張Sofa仔！」
美女Maggie可算是斯文一族，PS250能打動她的芳心莫過於是「舒服」兩字：「揀車我會揀舒適性行先，反而速度係其次，安全性對女仔嚟講點都較重要，PS250吸引我都係呢樣嘢，個Seat位好舒服；佢始終係綿羊設計，個Seat位比較闊大，仲有前後座位高度一樣，就算後座乘客上落都好方便。」
「我仲好鍾意佢嘅椅背設計，插入車匙一擰，跟住拉一拉保險桿，掀起個椅背，就即刻可以變成Sofa仔，靠住背嚟揸車，好有ChopperFeel。家陣揸出街都有好多人望！」說到底，愛美跟惹來艷羨目光，是女孩子買車的必要條件。」
Stanford：「小型雪櫃都擺得落！」
原來載貨也是PS250的強項，型男Stanford話：「我發現佢實用性相當高；好似座位咁可以前後調校約5至6吋。而電單車最大嘅問題就係載唔到嘢，但係PS250就唔同，掀起個椅背即刻有個極大嘅平台俾你放嘢；仲有PS250因為冇包圍，泊街都唔怕會揩花車身，打理嘅時間都唔需要咁多，而軍綠色就俾人又Man兼有ArmyFeel。」
起步加速是強項
HondaPS250的定位雖是綿羊級，但推出它的原意是既實用但又「玩嘢」，在速度上強項是起步，線性而帶點勁，絕不會有力不從心的感覺，但中段加速就略為平淡，不會帶來太大驚喜，拐彎表現比想像中佳，因有較高的把手和腳踏高度適中，不易接觸地面，而軸距也較短，因而提高了靈活性，前輪直徑達12吋的胎軨，也明顯地幫助PS250彎路轉向的敏銳度，頭尾避震的Setting以綿羊來說可算是偏硬，亦因此可營造出運動型的風格，匙孔位置還加有防盜蓋保護。
雖然PS250還未能夠令大部份人接受，可以說如你喜歡就會很喜歡，相反送給你也沒興趣，但問心那句，一架250c.c.的電單車，有巡航車的配置之餘還有街車的操控性，就連綿羊仔的方便和舒適性都兼備埋，一個價錢4種享受，還有至潮顏色選擇，試問除了PS250之外，還會有其他選擇嗎？
Profile
HondaPS250
引擎：249c.c.水冷式四衝程OHC單汽缸
馬力：19ps/7,000rpm
扭力：2.1kg-m/5,500rpm
傳動：CVT無段自動變速皮帶傳動
車架：高拉力鋼管搖籃式
懸掛：（前）套管前叉（後）單筒避震附預載調校
制動：（前）煞車碟配Nissin三活塞對向卡鉗
（後）鼓形制動（CBS連動系統）
尺碼：2,085×795×1,090mm
車輛提供：燦基電單車行（27622777）