瑞安房地產主席羅康瑞有位靚靚女友係人都知，但原來呢位上海姑爺連風水大師都有私家嘅。唔講唔知，瑞房有位做咗十幾年嘅高級機電工程師冼嘉鋒，佢係業餘風水師，瑞房呢幾年每次舉行項目動土儀式，都搵冼大師擇良辰吉日，永冇失準。
擇吉日冇失準
話說瑞房嘅重慶天地（翻版上海新天地)噚日4點舉行動土禮，之前一日同噚日朝早，重慶都不停落大雨，大家都有啲擔心要冒雨舉行儀式，但到下晝兩三點後，神奇嘅事發生嘞，啲雨停晒，天氣仲涼涼地，好舒服，大家可以喺好爽嘅環境下完成儀式。
就連羅康瑞自己都興奮不已，忍唔住喺一班記者面前大讚冼大師，但可惜，冼大師噚日趕住坐飛機一早走人，華華同佢緣慳一面，不過唔緊要，瑞房喺內地仲有咁多盤開工，冼大師應該有排做，華華總有機會見佢一面，希望到時佢可以贈番華華一兩句啦。據講，冼大師幫老闆擇日冇收錢㗎，羅康瑞難得有呢位私家風水大師幫忙，最緊要係靈吖嘛。
[email protected]