何為幸福爹哋？鍾鎮濤（阿B）昨日示範給大家看，他與女友范姜昨日帶同囡囡鍾懿出席父親節活動，囡囡年紀細細但無懼鏡頭，盡情展現其表演天份，搶咪唱歌、繪畫、跳舞、打鼓及嬌嗲冧爹哋，淪為配角的阿B看到囡囡搶晒鏡，只懂掛着有女萬事足的幸福笑容。
鍾鎮濤昨日帶同細女鍾懿出席赤柱舉行「親親Daddy展『龍』情」活動，當阿B於台上分享當爸爸心得時，囡囡鍾懿經已急不及待自己走上台，還拎走阿B的咪哼歌，媽咪范姜則於人群中充當攝影師，捕捉父女情。
𠱁盡老中青
鍾懿表演慾甚強，邊哼歌邊詐嬌攬爹哋，隨後整煲呔時，她又發揮創作力，將煲呔放在爹哋頭上扮頭飾，阿B笑指囡囡畫功屬於抽象派。眼見現場有大班小朋友，鍾懿又混入當中來個大合照，極之活躍，𠱁得現場老中青非常開心。
被囡囡搶去風頭，阿B甜笑表示囡囡鍾意玩耍，經常發揮其表演慾。談到有沒有廣告商洽談囡囡拍廣告，阿B說：「有傾過，但係囡囡只係做自己鍾意嘅嘢，可能未必做到廣告商要求，睇情況先接，絕對唔會迫佢拍。」
演皇帝王妃
阿B表示父親節留待子女安排節目，他又透露囝囝鍾嘉浚將於月中返港，他說：「我唔理，到時去邊都帶埋個仔，平時太少時間陪佢啦。」稍後阿B與女友參演囡囡幼稚園話劇表演，屆時他們分別飾演皇帝及王妃，來個親子互動。
採訪：馬建華
攝影：陳俊強
