喺東京輸完馬，次日早上喺酒店食早餐，唔少人以廣東話哭馬喪，好似佢哋個個輸咗幾十萬日圓咁款。好彩左丁山小注怡情，又誤打誤撞，中咗一場日本馬，派彩唔錯，埋單計數，輸咗少少啫。
食完早餐，喺新宿行一陣，搵肥仔K帶路去秋葉原。秋葉原有條電器街，世界聞名，左丁山十幾年前去過，呢次以為老馬識途，點知肥仔K話：「秋葉原唔同晒咯，電器街已經冇晒動力。」由新宿去秋葉原，坐JR總武線最快，如坐山手線，路程遠一啲。一到秋葉原車站，咦，環境好唔同喎，車站又大又靚，唔同以前嘅破舊寒酸樣，站旁有一座新型大廈，叫Yodobashi-Akiba，肥仔K話喺二○○六年四月落成嘅，此大廈面積闊大，每層賣唔同電器電子產品，啲大路貨如電腦、家電、玩具、音樂等等貨品堆積如山，睇到顧客眼亂。肥仔K話：「呢間新大廈係拆建舊樓重建而成，開業之後，憑貨多價平，加上一個絕招，就係積分計劃（GoldPointsAward），逢買一千日圓，就有一百分，如此類推，可以用積分買其他貨品，相等於九折，電器街啲舖頭邊有得爭呀，輸晒！」大集團經營，果然不同，Yodobashi-Akiba改變咗秋葉原嘅街道文化，「破壞」地區生態，唔知有冇街坊抗議呢，肥仔K笑言：「假如呢間係Wal-Mart或者Target，日本人或者會抗議美國文化入侵，不過係自己人噃，邊度有人嘈吖。」
行呢間大廈行到腳軟，八樓有間迴轉壽司，肥仔K話係正嘢，於是走入去食，OhToro（大拖羅）兩件，連稅賣四百一十八日圓（約等於二十七港元），夠晒肥美，抵到爛啦，香港邊度有得食！原來地下有一間同係築地喜代村經營嘅壽司店，有侍應，同樣一碟OhToro，只得一件，亦係賣四百一十八日圓。香港朋友去到秋葉原Yodobashi-Akiba，食壽司要到八樓！當晚晚上到新宿住友大廈五十二樓嘅瀨里奈（Seryna）食火鍋，左丁山食牛肉，其他人食蟹，每客一萬一千日圓，愛食北海道毛蟹者，一定食得好高興，而且仲有東京夜景睇。Seryna係鄭大班推薦嘅，佢介紹六本木嗰間，我哋就去咗新宿，應該冇分別。