喺東京食完一間好貴嘅瀨里奈之後，第二日就要慳啲咯，雖然想去六本木嘅「田舍家」，諗諗吓唔捨得，費事用多三、四萬日圓也。好幾年前Ｃ大姐喺東京做緊代表之時，請我哋去過。原來「田舍家」喺六本木有兩間，分別在地鐵站出口（RedAlmond咖啡室外）旁邊馬路嘅兩邊，處於橫街，唔識路嘅話就唔容易搵到，左丁山行錯方向，去咗另一間，搵唔到Ｃ大姐，急忙走番去接近RedAlmond嗰間，幾乎遲到。「田舍家」好有特色，未去過一定要試吓。
食平嘢最好係食拉麵，一碗就夠頂肚啦。喺新宿行京王、小田急兩間百貨公司，行到腳軟之後，聽肥仔Ｋ指示，喺小田急新宿駅西口轉右，直行十幾分鐘，見到一個大大隻字招牌TulleyCafe，招牌對面有一條小橫街，街口有一間「東邦銀行」，街內就有拉麵舖名叫「麵屋武藏」。推門入去，嘩，十幾人排緊隊，二十個客位坐滿晒人，既然嚟到，唯有排隊尾啦。擰轉頭一望，後面又有人湧到，要企出街外！排咗十五分鐘，先至可以坐低。弊，肥仔Ｋ唔喺度，自己唔識日文，點搞好，硬着頭皮叫CharSiuRamen，哈，得咗，即刻有高人指點，在售票機放入八百八十日圓買飛，張飛交畀「社員」（夥計），佢仲識寫漢字：「多油or少？」日本人食得好肥，我哋見到就怕，立即圈住個「少」字。
呢碗拉麵以香港價錢計，成五十六個幾一碗，梗係貴啦，但以日本物價而論，算係便宜。「麵館武藏」咁好生意，自然係以質取勝，否則難以在新宿立足，如果你喺香港機場都肯食拉麵嘅話，去到東京一定要試吓「武藏」啲真味道。
生意繁忙，六個夥計打全場，忙到不停手。「武藏」在店內貼出聘請「社員」通告，月薪三十二萬三千日圓（伸算約港幣二萬一千元），幾好人工喎，兼職散工就時薪一千二百日圓（七十七蚊港紙），唔怪得好多中國留學生喺東京係咁去兼職搵銀。食完碗麵，滿頭大汗，急急鬆人。日本百貨公司、餐廳、酒店裏面，空調有二十五、二十六度咁高，焗到暈，反而室外溫度係二十二度，可以唞吓氣。