喺香港，大家有冇諗過喺同一超市集團唔同分店買嘢，灣仔店同銅鑼灣店嘅價格會相差一倍呢？喺澳洲悉尼，市場地位等同香港百佳或者惠康嘅超市集團Woolworths，就俾當地電視台踢爆佢旗下兩間距離只有數公里嘅店舖，其中一間部份瓜菜價錢，竟然可以賣貴一倍有多。咁離譜，原來係欠缺競爭作怪。
分店價格差一倍
喺Woolworths嘅Liverpool店，以每公斤計算，哈密瓜賣2.98元（澳元．下同）、青燈籠椒賣1.99元、紅蘋果賣2.48元。但係4.5公里外嘅Moorebank店，哈密瓜賣到5.98元、青燈籠椒同紅蘋果售價同為4.98元。4.5公里有幾遠？大約圍住跑馬地馬場行3個圈啦。
當地電視台記者放蛇去Liverpool店買咗一堆瓜菜，合計33元；喺Moorebank店買相同嘅嘢就要63元，貴咗九成咁多。點解會咁離譜，記者查證下發現，因為Woolworths嘅Liverpool店外開咗間專賣瓜菜嘅小店，有競爭自然要降價遷就吓。
有「慳錢女王」美譽嘅simplesavings.com.au網主FionaLippey教路話：「好多煮食材料其實唔使喺超市買；唔好喺肚餓時行超市，因為嗰陣時你好多嘢都想買；最好只選購減價嘅貨品，唔好因慣性用同一品牌而買貴貨；仲有行入超市前應手持一張購物清單，有需要先買。」
因為工作關係，同超市打交道20年嘅PeterApplebaum就話：「貨品貴一倍，未必一定代表質量好一倍，消費者可以用腳投票，行多幾間超市格價；店舖見生意下降，自然會減價挽回顧客。」