擁有亞洲第三同第四貴獨立屋「創世紀」嘅屋主、世房主席許榮茂上周六冇喺倚巒買天價獨立屋，反而去咗發迹地上海，出席上海市僑商會第二屆會員大會，繼續冧莊做會長。
上海市僑商會係乜東東？呢個商會主要聯繫華人華僑同埋港澳同胞投資者，搞慈善公益事業，為國家同上海經濟發展貢獻……簡單啲嚟講，即係「愛國同盟會」囉。
嘉賓個個猛人
咁許生連任會長都算實至名歸，佢𠵱家專心發展旗下嘅內地房產股，剛剛先重組旗下公司，通過注資及互換資產，旗艦公司世茂房地產將揸住上海A股世茂股份，至於原本做本港地產嘅世茂國際，已經搞緊私有化。
咁熱愛祖國，怪唔之得大會嘉賓來頭唔細：國務院僑辦主任李海峰親自題詞、中共上海市委書記習近平人唔到都有賀信、上海市政協主席蔣以任畀面出席……咁多猛人，商會即刻捐咗50萬人仔畀07年世界特殊奧運會，仲喺雲南建希望小學，實行身體力行。
[email protected]