中信銀行（998）於上市之前，散戶期望頗高，但上市後股價反覆向下，另一隻深得「香港畢非特」睇好的碧桂園（2007）在「雷聲特大」的招股氣氛下掛牌，上市後走勢亦築起一條下降軌，但近日兩股似欲在低位掙扎回升。
有人認為，上述兩隻備受股壇矚目的股份在上市後表現差勁，可能係有人專登壓價收貨，目的係要大部份散戶投降沽清後，才挾高來一場「大龍鳳」。
在近期芸芸半新股中，星俠較睇好發售股數僅逾4億股多的新華文軒（811），事關即使要揀半新股嚟炒，係人都會揀隻街貨亁嘅嚟炒啦。
新華發售3.694億股H股上市，連同社保基金所佔1成，合共都係得4.06億股而已，從上市時公開認購超額120倍及國際配售超購30倍計，可想而知「餅仔」點會夠分？該股首日掛牌適逢大市調整，剛好提供一次震倉機會，之後股價炒上6.93元，最近新華唞氣，料將重新抖擻再炒，今次只要衝過8元，下一站將見雙位數字。