唔想懸紅幾萬蚊搵狗仔，就要揀隻乖狗仔，所以買之前除咗衡量自己的時間和能力外，不妨再睇埋狗仔的面相。原來人有面相睇外，狗都有相可以睇，唔想出現俗語所講：「阿崩叫狗越叫越走」的情況，一於教你辨別頑皮狗的十大特徵，費事買隻「惡狗」激自己。
記者：區佩嫦
資料提供：堪輿學家顏瑞麟師傅（26397908）
Top1起角眼脾氣臭唔聽話
小狗有對起角眼代表性格急躁、衝動，只要一睇唔順眼就會發脾氣，主人都無情講，發咗脾氣先算。正因為咁有性格，想佢乖乖哋聽主人話都幾難，簡單講句服從性唔夠。
化解方法：要與小狗多溝通，耐心教導，唔可以經常鬧牠，否則脾氣會更差。
Top2凸眼攻擊性強
凸眼狗性格衝動、好勝、喜怒形於色，佢自持體力好，又好生事，遇到唔合眼緣的狗或人，佢會即時發惡，手口並用襲擊目標。
化解方法：多帶佢到戶外活動，鬆弛神經，令佢心境回復平和。
Top3三角耳嘈到坼天
耳仔尖且向上豎起，顯示佢鬥心極強，個性十足，帶點過度活躍，叫牠去東，牠偏去西，又鍾意吠，永遠嘈到坼天。
化解方法：小狗多穿藍、灰、黑、香檳金、白等顏色的衣服或飾物；忌紅色。
Top4眼神飄忽蠱惑狗
和人一樣，眼神飄忽、唔望人的狗，性格蠱惑，心不在焉，叫佢都唔會理，好似借咗聾耳陳隻耳，其實小狗諗緊計仔，睇睇點樣整蠱主人，小心！
化解方法：循循善誘，唔好打佢，或搵隻乖狗返嚟同佢玩，善導佢。
Top5耳硬睇人蝦
無論企耳或垂耳，耳仔硬代表硬頸，性格率直，自我中心、執着，鍾意睇人嚟蝦，知道你易蝦，就會蝦死你，主人都無面畀。
化解方法：可用以柔制剛的方法教導，另外主人不宜太過遷就。
Top6鼻短小器狗
北京、芝娃娃等狗類的鼻較短，但鼻短是和同類狗相比。短鼻狗性格較火爆、好勝心強，器量小，一有唔啱聽的說話，往往聽唔到，睬你都儍。
化解方法：不能太遷就佢，否則會越來越過份。
Top7嘴尖貪食收買佬
嘴尖代表為食狗，為咗食會聽足主人吩咐，但只要食飽，充滿性格的佢就唔會睬你！嘴尖的狗較自我中心，鍾意同其他狗鬧交、打交，最衰係鍾意收埋主人的物件，今日收埋你隻拖鞋，明天收埋你個手袋，等你搵餐飽！
化解方法：出街時必須用狗帶拖住，否則小狗會與其他狗打交。
Top8毛硬唔聽主人講
毛硬的狗攻擊性、鬥心強，做事橫衝直撞，想做就去做，唔理命令，只要覺得啱就去做，令人無所適從。
化解方法：多做狗隻美容，改善毛髮的鬆軟程度；多往戶外做運動，發洩精力。
Top9骨骼硬反叛惡教
希望隻狗健康、骨骼強壯?原來骨骼和肌肉硬都係隻「惡教狗」，此類狗個性傲慢，帶點反叛個性，行唔想郁?想佢聽你講，絕對艱難。
化解方法：多往戶外，加強佢啲活動能力。
Top10尾巴短直愛離家出走
尾巴短、直兼較硬代表活動能力強，較八卦，最鍾意去街，加上佢跑得快，貪玩起上嚟更會離家出走，去蒲去玩。
化解方法：多與佢溝通及玩耍；出街必須用狗帶，以免「離家出走」。
現場示範70%準確
為咗測試顏師傅的準確度，一於搵咗兩隻狗畀師傅睇睇，分別係牧羊狗Danielle和拉布拉多Mocha。
顏師傅一見Mocha就讚呢隻係好狗：「Mocha額高呈方圓代表善解人意、聰明，識睇主人眉頭眼額；法令開揚則唔怕事，識得保護主人；鼻樑直眼有神，對主人言聽計從。
至於Danielle，其眼圓額闊，夠晒聰明，愛表達自己，不過耳仔起角，服從性唔算太高，而且會睇人『恰』，不過都好忠心唔會周圍走。」
主人Vicki話幾準，「Mocha好聰明，試過同我男友一齊做舞台劇，上台唔怯場、唔吠，做咗幾場都無出錯；至於Danielle都有七成準，因為佢真係經常走嚟嗚嗚嗚咁同我傾偈咁，不過佢就大小姐脾氣，有時唔理我。佢仲試過離家出走，不過幾個鐘後又企番喺屋企門口等我！」
狗如人一樣，可以根據外形分為金木水火土，每個屬性均各有性格：
