在《師奶兵團》中，姜大偉飾演的「師奶」高永權，一度介入鄧萃雯和謝天華的婚姻之中，而現實生活中，一直被視為好老公的姜大偉，早年與周嘉玲拍攝《再見亦是老婆》時也曾傳出緋聞，甚至有指姜大偉太太李琳琳為此而由溫哥華趕返港昅實老公。
斥無綫炒作緋聞
提到這宗唯一一次的花邊新聞，姜大偉顯得有點勞氣：「當時部劇攞我嚟做宣傳囉！自己老婆一直喺度（指太太並非因為緋聞而趕返香港），我好㷫㗎，我叫佢哋（指無綫）宣傳搵第二樣，唔好攞我嚟搞，呢啲嘢寫第一次、第二次到第三次，啲人就會當真吖嘛！好在我老婆都係呢行嘅人，明白發生乜嘢事，如果唔係，我有幾多個老婆都離晒婚！」
今年是姜大偉與李琳琳結婚33周年，談到夫婦相處之道，姜大偉認為最緊要了解對方的需要，他說：「了解對方需要乜嘢，大家做乜都有商有量，咁就唔會做一啲令對方唔鍾意嘅事啦！」
「缺點亦係優點」
問姜大偉對鄧萃雯、商天娥和葉童這三位師奶拍檔感覺如何，他說：「雯女太執着，每一樣嘢都要清清楚楚，好似連飲啖水都要知點解，呢個係佢缺點，亦都係佢優點，每一件事佢都好認真去做，無非係為咗部劇好啫。葉童呢，佢明明係師奶，但就唔肯認自己係師奶！佢俾人話演技浮誇，我覺得冇所謂，有啲人做戲捉唔到個point，做到過咗界，但葉童冇過界，佢屬於另類師奶，我覺得佢好專業。至於娥姐，佢一向大癲大肺，係性情中人，呢幾個師奶做戲絕對冇問題，佢哋完全捉到角色重點。」
