葉童繼不滿《師奶兵團》戲份比鄧萃雯少，以及接演的希拉莉角色不討好之後，日前她接受專訪時，又大爆為劇集埋尾當天被監製林志華玩殘，葉童說：「拍ending嗰日，我已經一早開6點鐘外景，之後返廠開工，個個收晒工，係得我一個拍到第二朝早10點，幾乎踩足30個鐘，我心諗，唔通佢哋臨尾繼續『蝦』我？又或者係因為我成日鬧監製，佢臨尾向我報復？」
「怕窒親佢」
問到對劇中兩位拍檔鄧萃雯和商天娥的印象時，葉童不諱言首日開工便被商天娥寸爆，她說：「第一日開工，見佢着咗件粉紅色T恤，自己咪唔揀嗰隻色，揀過第二件開工，後來見佢換咗第二件衫，我就問佢：『乜你着呢件呀？』點知娥姐即刻好cool咁話：『我着呢件有乜問題？』聽到佢咁講，我真係有少少覺得佢寸囉，之後我講嘢都好小心翼翼，怕唔覺意又窒親佢，後來拍落先至知道佢份人講嘢係咁直，好不拘小節！」
葉童續說：「娥姐平日攞住鎖匙銀包就開工，好簡單，差啲未着對拖鞋返嚟，但雯女就完全相反，佢其實可以唔使咁辛苦，但偏偏佢就成日做到好辛苦咁，可能佢投入咗落去個角色度，對自己要求好高啦！」儘管有傳葉童與雯女及娥姐不和，又被指為人冷酷，葉童也是一笑置之說：「初初大家都唔識，唔通仲要扮到懶熱情咁咩！不過，點都有人講㗎啦，總之我今次同佢哋合作愉快！」
唔呷老公醋
《師》劇中，葉童經常懷疑丈夫到處拈花惹草，現實生活中，她的丈夫陳國熹也不時傳出緋聞，葉童不諱言會為傳言感到不開心，她說：「因為太突然，失驚無神傳呢啲新聞，對自己心情梗係有影響，會有少少唔開心，但自己一定信老公，我覺得有時一男一女拖吓手，都唔代表乜嘢啫！如果吓吓要控制住對方、check住對方，又或者知道對方唔信任自己，你都會好嬲㗎啦！」