有股壇長毛之稱，身兼港交所（388）非執董嘅DavidWebb近期可謂相當出位，上星期繼要求王氏港建（532）提高私有化價格及表明會投反對票後，又出席地鐵（066）股東大會，指兩鐵合併對地鐵小股東不利，呼籲小股東日後投反對票。
不過，反對地鐵合併一事涉及民生同政治因素，即使以投資者身份講得通，但政治上站錯邊好易令佢形象大損。
呢位身家豐厚嘅獨立投資者係工業股專家，近期買貨而需披露有華翔微電（1195），在4月披露以每股1元買入20萬股，共持貨逾5%。
此股另一買重貨嘅投資者係西京投資管理（AtlantisInvestmentManagement），現持貨超過16%，係第2大股東，持貨總值近1.4億元。最近兩次，大股東分別以1.09元及1.25元減持，而西京則同時同價增持相若股份，睇嚟係西京向大股東要貨。
西京主席劉央來自北京，投資年資超過14年，由她擔任投資顧問的AtlantisChinaFund和AtlantisChinaFortuneFund，於06年的回報率竟高達98.1%和73.3%，西京管理的資產亦由當初數億美元，大幅增至42億美元，可見西京投資眼光的確獨到。
預期PE不足5倍
華翔主營印刷線路板產銷，現價往績PE只係7倍，早前公佈中期純利增長30%至6590萬元人民幣，若下半年度純利與上半年度相若，全年純利約1.32億元人民幣，預期PE不足5倍，難怪會被西京睇中。