花旗股市前晚愁雲慘霧，投資者俾聯儲局阿伯嚇親，驚住「息魔」再現，道指一晚就唔見咗兩百，好耐都未試過，搞到昨日亞洲呢邊一仆一碌，港股同㗎仔股市都唔見咗成300點。
恒指好唔容易先至企喺條100日線收市，下禮拜一守唔守得住都仲要睇花旗昨晚個股市點走。咁花旗股市會點？啱啱跌，斷估都仲會有沽壓。
家吓其實最難搞嘅就係債息，10年債息升破5厘，聯儲局又話通脹有威脅，咁你話投資者點會唔擔心加息嘞，睇通脹升又睇息升，投資者對長息嘅預期就自然會轉變，加息就變成合理嘅發展，如果聯儲局冇辦法紓緩投資者對利率上升嘅預期，金融市場隨時會出現大變，點解？因為做生意要計息，投資回報都要計息，如果冇估錯，聯儲局班官好快就會走出嚟講嘢。
早幾日有分析員走出嚟講話債息升唔使驚，因為係沽債券套錢去炒股票，𠵱家睇落唔多似，大家都係要小心啲好。除咗花旗股市之外，大家亦要留意吓油價，睇油價呢兩日嘅動作，隨時會抽上去「燃燒」吓啲加息嘅預期，之後黃金同資源都可以齊齊炒，係咪咁？好快就知。
神華C輪3685：神華（1088）昨收24.50元，呢幾日升過上26.05元高位，跟個市調整番啲係健康嘅發展，神華仲係當炒嘅股份，反彈可以上番去26元樓上，睇28元，可以買啲神華C輪3685，隻輪昨收46.5仙，槓桿率5.3倍（有效3.8倍），正股升上28元，3685應該喺73仙樓上，正股跌穿23元止蝕。