時間：96年2月
地點：匯景花園
人物：甄子丹
經過：甄子丹96年同萬綺雯傳緋聞，男方即被揭未辦妥離婚手續。11年前，子丹去分居太太梁靜慈屋企探囝囝，其間傾贍養費同撫養權問題，大家傾唔埋欄，繼而動武收場，搞到要報警求助，仲踢爆子丹已婚同已為人父嘅秘密。
當日子丹一心諗住探仔，點知分居太太追討贍養費，二人越講越激動，有消息指子丹一拳打落女方嘅頭部，對方即用手擋住，並馬上報警，子丹轉身離開，分居太太即按大廈警鐘，請警衞攔截子丹，後來警察到場調停，勸喻佢哋和解。
事後子丹接受訪問時堅決否認出手打人，佢話：「如果我有打過佢（分居太太），或對嗰晚嘅事講任何大話，我一出街即刻俾車車死。如果我真係有打佢，佢仲唔死咩，警方都會落案啦。」子丹仲話同太太94年11月已經分開住，仲委託律師辦理分居，佢話每個月畀5萬蚊做贍養費，最希望係爭番囝囝嘅撫養權。最終搞咗一大輪囝囝都係跟佢媽咪，子丹同萬綺雯嘅感情之後亦都玩完。
03年，子丹同多倫多華埠小姐冠軍汪詩詩結婚，𠵱家仲有個乖乖女甄卓宜，近日汪詩詩又直認再度懷孕，好快卓宜又多個伴啦！
本欄逢周一至周六刊出
