鄧萃雯、商天娥和葉童主演的《師奶兵團》，將於今晚9時播映個半小時大結局，為谷收視，雯女、娥姐、葉童聯同劇中雄性師奶姜大偉，特於日前在黃埔博藝會進行一場師奶入樽牙骱戰。幾位師奶埋身肉搏，有如NBA球星上身般射籃入樽，結果滿以為能夠以一敵三的姜大俠被打到仆地，娥姐因為運動細胞不足而捧蛋，獨剩被傳不和的雯女和葉童打成平手，難分高下。
牙骱戰當日，同場加映一場師奶「暗戰」，葉童繼不滿戲份比雯女少之後，再大爆曾被娥姐說話寸爆而感不滿；雯女則一度以為監製對葉童有特別優待……一場師奶風暴，一觸即發。 撰文：戴彩煥、藍文浩
雯女：以為葉童獲優待
葉童埋怨自己在《師奶兵團》中的戲份比鄧萃雯少，原來雯女也一度以為監製對葉童有優待，雯女說：「有報道話葉童接呢部劇，講明開工開到夜晚11點，等我哋以為做乜對佢特別優待，但原來啲人搞錯晒，係就係童，不過唔係葉童，係啲童星啫！」
所謂「三個女人一個墟」，雯女謂與葉童和商天娥合作得相當愉快，在劇集開拍之前，她還主動約葉童和娥姐食飯聯誼，雯女說：「大家都係成熟嘅人，亦係唔同性格嘅師奶，大家都希望有好嘢可以出到嚟，所以開拍之前，我主動約齊劇中三對夫婦加埋John哥（姜大偉）同監製食飯，傾吓點樣可以做好啲，之後五個男人走晒，我哋三個師奶仲一齊去飲嘢傾偈㖭，其實女人拍嘢都唔一定有是非嘅！」
拍到肌肉痙攣
雖然雯女表示今次拍劇沒有是非，但她卻大呻為拍《師》劇導致五勞七傷，她說：「有場戲係講打緊風，我喺度搵仔女，咁本身係冇風吖嘛，我咪要揸住把遮拗晒腰咁，扮俾大風吹囉，之後我又要抱住芳芳（劇中女兒）走，結果搞到條腰肌肉痙攣，痛到唔郁得，要做物理治療，使咗成萬幾蚊，最慘係冇時間休息，就算做物理治療，都係用食晏晝飯嗰段時間咋！」
《師奶兵團》有口碑有收視，惟獨光芒卻被同期播出的重頭劇《溏心風暴》搶去不少，對此雯女說：「其實冇得比較，《溏心》播咗20幾集我哋先播，收視應該係高層同監製去擔心，我最緊張反而係觀眾對我呢個師奶嘅口碑。」無綫有意開拍《師奶》續集，雯女忽發奇想建議無綫大可拍攝《師奶也瘋狂》，她說：「今次可以掉轉係女人出外面做嘢，男人失業，好似娥姐之前做訪問所講咁，師奶變晒又靚又索，男人喺屋企湊小朋友，總之就係要衝出屋邨。」
