西甲仲有兩輪，今年有啲唔同，因為邊隊冠軍，未知！邊隊打歐協盃，未知！邊兩隊陪塔拉戈納降班，未知！所以，今年西甲，真係幾精采！以上3樣，我關心邊隊降班多啲，因為皇蘇同切爾達都係我愛隊，真係唔想佢哋降班；另一關注點，就係維拉利爾可唔可以後來居上，奪歐協盃參賽資格！
維拉利爾今晚對住要護級搶分嘅畢爾包，兩隊都無留力空間！我相信呢場波係五五波，點解？維拉利爾同畢爾包狀態都ok，前者6連勝，贏過巴塞、又贏埋華倫，你服唔服？至於畢爾包，上場一球搞掂馬略卡，護級有起色（馬略卡有放水之嫌，避免畢爾包降班，最終搞到巴斯克地區放炸彈，足球好政治）！
維拉利爾對畢爾包一定好精采，兩隊入球能力唔需要懷疑，至於主客和，當然睇好主隊；不過畢爾包要護級，我覺得有變數，所以都係要入球「大」，風險較低！全日心水唔少得皇馬，已連續7場開「大」，加上波膽經常係3:2，小注試吓呢個波膽，絕對玩得過！
周鵬
商業1台《球迷集中贏》主持
電郵：[email protected]